Itūvosor Latgolys navaļstiskuos organizacejis pīduovoj divejus vosorys seminarus latgalīšu rokstu volūdys apgivei i latgaliskuos pošapzinis styprynuošonai. Nu 26. da 29. juļam bīdreiba „Latgolys Studentu centrs” i latgalīšu kulturys gazeta LaKuGa.lv aicynoj iz latgalīšu rokstu volūdys vosorys školu „Roksti!”, nu Latgalīšu volūdys, literaturys i kulturviesturis školuotuoju asociaceja nu 21. da 24. augustam reikoj školuotuoju i studentu kursus „Vosoruošona”.
Latgalīšu rokstu volūdys vosorys škola „Roksti!” nūtiks nu 26. da 29. juļam Vileks nūvoda Škilbanu pogosta Balkanūs i tymā aicynuoti pīsadaleit Latgolys kulturys īstuožu, biblioteku, nūvodu pošvaļeibu, nūvodpietnīceibys darbinīki, žurnalisti, školuotuoji i studenti – kotrs, kas ir gotovs vuiceitīs latgalīšu rokstu volūdu i sagataveit rokstus par nūvoda i regiona dzeivi latgaliski regiona masu medejim. Vosorys školā byus na viņ volūdys apgives nūdarbeibys, nu ari īspieja īsapazeit ar pasuokumu fotografiešony, žurnalistikys, socialūs medeju, nūvodpietnīceibys pamatim, taipat ari pīsadaleit ar latgalīšu kulturu saisteituos aktivitatēs (dzīduošona, daņči, latgalīšu teatris, puorguojīni i c.). Vosorys školys nūtikšonu atbolsta LR Kulturys ministreja i Vaļsts Kulturkapitala fonda Latgolys kulturys programa, kab veicynuotu kvalitativys, latgaliski raksteitys informacejis publiciešonu regionalajūs medejūs i cytūs informacejis olūtūs. Dasasaceišona vosorys školai da 5. juļam.
Školuotuoju i studentu kuris „Vosoruošona” byus nu 21. da 24. augustam Rēzeknis nūvoda Nautrānu pogosta Rogovkā. „Vosoruošonys” dalinīku pulkā aicynuoti pīsadaleit školuotuoji i studenti. Golvonuo kuru tema byus latgalīšu rokstu volūdys apgivis programa školuos. Kurus dalinīki vuiceisīs latgalīšu rokstu volūdu, literaturu, izstruoduos vuiceibu metodis i leidzekļus latgalīšu rokstu volūdys apgivei školuos, kai ari pīsadaleis kulturys programā ar ekskurseju i latgaliskim vokora pasuokumim. Dasasaceišona kursim da 3. augustam.
Latvejā ir 164 510 cylvāku (napylni 8 % nu vysim Latvejis īdzeivuotuojim), kas 2011. goda Tautys skaiteišonā atzynuši, ka latgalīšu volūdu lītoj kasdīnā, nu tei pamatā ir runuotuo volūda. Raksteit i skaiteit grybātuoju i pratieju skaits proporcionali ir nalels. Kab veicynuotu latgalīšu rokstu volūdys dzeivuotspieju, organizacejis aicynoj pīsadaleit seminarūs i īgiutuos zynuošonys iz prīšku lītuot ari kasdīnā.
Vaira dazynuošonai par seminarim i īspiejom pīsadaleit var atrast latgalīšu kulturys portalā „Latgalīšu kulturys gazeta” – www.lakuga.lv.
Vairāk informācijas par semināriem un iespējām piedalīties skatīt latgaliešu kultūras portālā „Latgalīšu kulturys gazeta” (LaKuGa) – www.lakuga.lv.